Marthlé Smit is Bakgat-wenner
Marthle Smit
Marthlé Smit van Gqeberha het met haar muesli, bosbessie en sjokoladebeskuit die eerste wenner geword van RSG en Virseker se Bakgat-beskuitkompetisie en ‘n pryspakket ter waarde van meer as ‘n halfmiljoenrand losgeslaan.
Die top5-finaliste se beskuit is op lug geproe tydens ‘n regstreekse buite-uitsending met RSG se Derrich Gardner en Renske Jacobs vanaf Virseker se kantore in Johannesburg, waarna die wenners aangewys is.
“Ek wag nog dat dit moet insink! Alles voel so onwerklik,” het Marthlé gesê.
Dominique Stander het die tweede prys ontvang en Genevieve Cillié die derde prys. Elkeen het ‘n kontantprys van R10 000, geborg deur Virseker, ontvang.
Die kompetisie is op Erfenisdag vanjaar op RSG geloods en die stasie is oorval met inskrywings. Meer as 1 500 inskrywings van regoor die land het opgedaag. Luisteraars moes 24 stukkies beskuit instuur, saam met ‘n volledig voltooide inskryfvorm.
Daar is tydens ‘n uitdunronde geproe en toe is altesame 72 finaliste aangewys. Hierdie 72 baksels is op lug deur bekendes en omroepers geproe, terwyl ‘n streng puntestelsel en kriteria gevolg is.
Die Top-5 beskuitbakkers, met die wenner, Marthle Smit, heel regs.
Heloise Erasmus van Bethal met haar outydse karringmelkbeskuit; Petra Groenewald van Springs met haar kersiebeskuit; Dominique Stander van Alberton met haar “Death by Chocolate”-beskuit; Genevieve Cillié van Vereeniging met haar witsjokolade-en-bosbessiebeskuit; asook Marthlé Smith van Gqeberha met haar muesli-bosbessie-en-witsjokoladebeskuit was die top5-finaliste.
Die beoordelaars wat die top5-finaliste se splinternuwe baksels beskuit op lug geproe het, was Andriëtte de la Harpe (eienaar van Mondvol maar ook die mentor vir die Bakgat-wenner); Carina Johnson (kleindogter van dié Ouma van Ouma-beskuit en ook mede-eienaar van The Little Deli in Linden); Johanni Jennings (Virseker se hoof van bemarking); Riaan Pretorius (hoofregsadviseur en groepsmaatskappysekretaris van Virseker) asook die akteur en skrywer Zane Meas.
“Die veldtog spreek tot ons harte, want ons voel Virseker en Afrikaans gaan hand aan hand soos koffie en beskuit,” het Jennings gesê.
“Ons voel ook RSG deel ons liefde en opwinding vir Afrikaans. So, om hande te kon vat met RSG met ‘n projek soos dié waar ons Afrikaans-wees vier en die gemeenskap deel maak van die projek was vir ons ‘n geleentheid wat ons eenvoudig net nie van die hand kon wys nie.”
Volgens Louise Jooste, RSG se sakebestuurder, is die stasie oorweldig deur die passie van die deelnemers asook hul verskeidenheid baksels. “Deelnemers se menswees is vertoon deur hul beskuit wat met soveel liefde en moeite voorberei is.
“Daar was vele briefies, foto’s, versierings en selfs ‘n tuisgemaakte karton-vertoonoondjie wat ontvang is. RSG se luisteraars is werklik die beste! Nogmaals dankie aan elke deelnemer. Mag julle idees en dryfkrag vir julle vele deure open,” het Jooste gesê.
Die algehele wenner se pryspakket bestaan uit ‘n kontantprys van R20 000 geborg deur Virseker; R350 000 se lugtyd op RSG; mentorskap deur De la Harpe en die ontwikkeling van die korporatiewe identiteit van die wenner se onderneming.
Suid-Afrika se eerste Michelin-stersjef, Jan-Hendrik van der Westhuizen, gee aan die wenner ‘n reklamepakket van R100 000 in die tydskrif JAN The Journal.
Dié prys is saamgestel om die wenner in staat te stel om sy/haar eie onderneming te kan begin, en om entrepreneurskap in Suid-Afrika te bevorder.
Die wenners van die tweede en derde plek ontvang ook elk R10 000 vanaf Virseker. Die vierde en vyfde plekwenners ontvang elk R5000 vanaf Virseker. En Panne-man gee ook vir elk van die vyf finaliste ‘n beskuitpan.
RSG het ‘n jarelange vennootskap met Winterhoop, wat takke landwyd het. Winterhoop gaan die oorblywende beskuit-inskrywings aan behoeftige mense versprei.
Die luisterryke uitsending en bekroningsgeleentheid het verder opslae gemaak toe 13 November elke jaar tot Nasionale Beskuitdag verklaar is.
Ja, jy kan beskuit bestel by die Top-5
Hier is die top-5 se epos adresse indien jy beskuit by hulle wil bestel:
Marthlé Smith se muesli, bosbessie en wit sjokolade beskuit: marthlesmith@outlook.com
Vir meer inligting besoek rsg.co.za of die stasie se sosiale media.
Lees en luister ook:
https://www.rsgplus.org/bakgat/
