Mariëtta Kruger

Die veteraan-omroeper, uitsaaier en nuusleser Mariëtta Kruger gaan eersdaags met sabbatsverlof en neem ’n blaaskans van haar nuuslees-skof in RSG se gewilde middagprogram, Spitstyd.

Mariëtta het diep spore in die uitsaaibedryf getrap en selfs ’n nuwe geslag omroepers, nuuslesers en joernaliste met haar kennis en ervaring bemagtig.

In 2014, toe sy weer by RSG aangesluit het, het Beeld haar beskryf as “haar majesteit, die koningin van uitsaai”. Mariëtta erken self dat radio haar eerste liefde bly.

Mariëtta het haar uitsaailoopbaan 44 jaar gelede by die destydse Radio Suid-Afrika in Seepunt begin. In 2022 is sy deur die Afrikaanse Taalraad met ’n Koker-toekenning bekroon vir haar lewensbydrae tot Afrikaans.

Sy glo dat ’n mens net so goed is soos jou laaste uitsending en dat jy “nooit te oud is om te leer nie”.

Haar laaste dag as lid van die Spitstyd-span is op Vrydag 20 Desember, waarna sy haar sabbatsverlof wil neem en meer gehaltetyd met haar geliefdes wil geniet.

Karen Augusta – ’n sakevrou, stemkunstenaar en omroeper van Gauteng – gaan die leisels by Mariëtta oorneem. Sy is al vir ’n string radiopryse benoem vir haar rol as nuusleser asook aanbieder van ontbyt- en dagprogramme.

Volgens RSG se sakebestuurder, Louise Jooste, was Mariëtta vir soveel jare ’n anker vir die stasie. “Sy is ‘n uitsaailegende en het regdeur haar loopbaan ‘n gehaltestandaard gestel tesame met haar liefde en passie vir keurige Afrikaans. RSG is ryker vanweë Mariëtta se insette, leiding en inspirasie. Ons gun haar die tyd saam met haar geliefdes en ’n blaaskans weg van die mikrofoon.”