Ons nuwe vervolgverhaal 'Tien dae' deur Lee Doubell begin vandag!

Luister van vandag elke weeksdag om 14:45 na ons nuwe vervolgverhaal deur Lee Doubell. Tien dae is ‘n opvolg van Sestig Dae.

Agtergrond en storie
Twee jaar ná hulle storie tot ŉ einde gekom het, word al die karakters wat ons in RSG se vervolgverhaal Sestig Dae leer ken het, weer byeengebring.

Hierdie keer word hulle uitgenooi om tien dae op die SS Salacia, ŉ luukse plesierboot, deur te bring. Die misterieuse eienaar van die boot belowe om almal ŉ groot bonus te betaal as hulle die uitnodiging aanvaar.

Met Tien Dae word daar weer gewerk met verslawing in al sy vorms, en die gevolge daarvan. Van die passasiers aan boord van die SS Salacia word gekonfronteer met die gruwel van geslagsgeweld, en die nagevolge van sulke aanvalle.

Al die karakters is terug, maar ná twee jaar het hulle verander, en die spa-vakansie op ŉ luukse skip bring allerhande eienskappe van hulle karakters na vore – soms goed, maar dan ook sleg.

Aan die einde van Sestig Dae het Meneer X spoorloos verdwyn, maar Dennis die privaatspeurder werk saam met Interpol om te probeer uitvind wie die misterieuse Madame Kyrioskie is.

Richard en Tanya het intussen goed geld gemaak uit die topverkoper wat Tanya oor Meneer X en sy manewales geskryf het, en voel hulle verdien ŉ kort vakansie ná al hulle harde werk.

By die Nova Sentrum behandel Magda en Susan steeds hulle pasiënte, en Lauren is ongelukkig weer terug as ŉ pasiënt.

Die span wat Sestig Dae so suksesvol vervaardig het, is almal weer terug en hierdie keer word alles op see, op die spel geplaas.

Verwag dieselfde bekende stemme in ŉ splinternuwe avontuur wanneer hulle vir tien dae aan boord van die SS Salacia probeer ontspan en ou vriendskappe hernu. Luister of laai gerus Sestig Dae op potgooi af (https://www.rsg.co.za/rsg/potgooi-resultaat/?_sf_s=sestig%20dae) en wees gereed vir Tien Dae.

Die karakters en rolverdeling
Die rolverdeling is:

Frieda van den Heever as Susan Cilliers,
Royston Stoffels as Richard April,
Rene Cloete as Tanya Koster,
Roeline Daneel as Essie Cilliers,
Eugenie Wiggins as Bettie Winkler,
Hannah Borthwick as Meneer X (Izel),
Ronel Geldenhuys as Magda Lewis,
Cole Wessels as Dennis Donovan,
Chloe van Rooyen as Lauren Beyers,
Albert Maritz as Deon Smit,
Stefan Vermaak as Albert de Wet en
Jacques Bessenger as Kaptein JP Swart.

Anrich Herbst is regisseur en Lee Doubell die skrywer.