Internasionale militêre reg en konflik – Deel 1

Dis vandag die veertigste dag van die Israel-Hamas oorlog, en beelde van verwoesting en die hoë dodetal laat baie mense geskok. Israel word beskuldig van oorlogsmisdade, volksmoord en buitensporige vergeldingsaanvalle. Internasionale militêre reg kan baie kompleks wees, daarom kan ‘n mens nie elke Jan Rap en sy maat op sosiale media, of selfs politici, goedsmoeds glo nie. Om ons te help verstaan, sluit professor Michelle Nel, ‘n visedekaan van die Fakutlteit Krygskunde aan die Universiteit Stellenbosch by ons aan, in die eerste van twee gesprekke hieroor. Michelle is onder meer ‘n spesialis in internasionale reg oor gewapende konflik.

Internasionale militêre reg en konflik – Deel 2

Die Israelese weermag het gister met ‘n militêre operasie in die al-Shifa hospitaal-kompleks in Gasa-stad begin. Israel beweer Hamas gebruik die hospitaal as ‘n bevel- en beheerkwartier vir die voortdurende aanvalle op Israel, sedert die 7de Oktober vanjaar. Israel word wyd veroordeel vir sy swaar bombardering en grondoffensief in Gasa. Talle regeringsleiers, onder andere president Cyril Ramaphosa, beskuldig Israel van oorlogsmisdade en volksmoord. Ons sit die gesprek van gister, oor internasionale wetgewing oor gewapende konflik voort, en ons praat weer met professor Michelle Nel, ‘n visedekaan van die fakulteit krygskunde aan die universiteit Stellenbosch.